FIER- Alfred Beleri nuk do të lirohet më kusht dhe do të qëndrojë në burg, të paktën për muajin gusht. Gjykata e Fierit, ku i dënuari me burgim 2 vite për blerje votash kërkon liri me kusht, vendosi që seancën e radhës ta zhvillojë më 2 shtator ora 10:00.
Gjyqtari Alfred Konomi nuk u mjaftua me raportin e juristëve të burgut të Fierit që e cilësojnë sjelljen e Belerit me nota pozitive, teksa nënvizonin faktin se më parë ka qenë i përshirë edhe në vepër tjetër penale.
Gjyqtari kërkoi dhe një raport vlerësimi me plan individual nga shërbimi i provës, ndërsa shtyrja me një muaj lidhet edhe më faktin se në gusht gjykata merr pushimet. Shtyrja u kundërshtua nga mbrojtja e Fredi Belerit të cilët kërkuan vendimmarrje. Avokati Eugen Gjyzeli tha se është urdhri i kryeministrit Rama që ta mbajnë në qeli.
Kërkesa e Belerit për liri me kusht vjen pas betimit të tij si eurodeputet në Parlamentin Europian. Beleri shkoi në Strasburg pas lejes 5-ditore që mori nga Drejtoria e Përgjithshme e Burgjeve. Ai ndodhet që prej muajit maj të 2023 pas hekurave dhe u dënua me 2 vite për korrupsion zgjedhor në zgjedhjet lokale të 14 majit.
