Ditën e sotme në një seanca që zgjati më shumë se një orë e 30 minuta, Gjykata Administrative e Tiranës ka rrëzuar kërkesë padinë e bërë nga prindërit e fëmijëve të kopshtit ‘Zubeyde Hanim’.
Pavarësisht padisë së prindërve ku kërkohet anulimi i urdhrit të ministrisë së Arsimit, Rinisë dhe Sportit, gjykata ka marrë vendimin për rrëzimin e kërkesës së bërë prej tyre. Ndërkohë, avokatët e institucionit që po merren me ndjekjen e çështjes e cilësuan këtë vendim si të paligshëm dhe paralajmëruan se do të bënin një ankimim në Gjykatën e Apelit.
Kujtojmë se pas vendimit të ndërmarrë për mbylljen e këtij institucioni, para kryeministrisë u organizua edhe një protestë ku morën pjesë prindër që çonin fëmijët e tyre në këtë kopësht. Në deklaratat e tyre, ata thonin se fëmijët kishin pësuar një situatë të rënduar psikologjike.
Në vendimet e qeverisë më 22 shtator, nga Këshilli i Ministrave u vendos mbyllja e kopshtit privat “Zubeyde Hanim”, Tiranë. Kopshti është mbyllur me urdhër të ministres së Arsimit dhe Sportit dhe shkak thuhet se është bërë konstatimi i shkeljeve të rënda të legjislacionit në fuqi.
Kopshtit ju la detyrim të kthejë pagesat e kryera nga prindërit, të bëjnë të mundur transferimin dhe të plotësojë çdo dokumentacion që i kërkohen nga institucionet. Kopshti është hapur në tetor të vitit 1998 dhe është pjesë e shoqërisë “Turgut Ozal” që financohet nga kleriku filantrop, Fethullah Gylen, që njihet si kundërshtari më i madh i presidentit turk Erdogan dhe jeton në SHBA.
