Këshilli Bashkiak i Tiranës mbajti sot një minutë heshtje në nderim të Arben Tafaj, ish-anëtar i këtij këshilli dhe një figurë e shquar në promovimin e vlerave kulturore dhe qytetare të kryeqytetit.
Tafaj, i cili ndërroi jetë së fundmi, ishte kryetar i shoqatës “Tirana,” një organizatë që ka luajtur një rol të rëndësishëm në ruajtjen dhe promovimin e trashëgimisë kulturore të Tiranës.
Kryetari i Bashkisë së Tiranës, Erion Veliaj, shprehu ngushëllimet e tij dhe vlerësoi kontributin e Arben Tafajt, duke e cilësuar atë si një zë të fuqishëm për qytetin.
“Bashkohem edhe unë me ngushëllimet për mikun tonë, Arben Tafajn, edhe për kontributin e jashtëzakonshëm që ka dhënë jo vetëm për Këshillin Bashkiak dhe grupin politik që përfaqësonte, po për shoqatën “Tirana” për “Sofrën Tironse”, për një sërë kontributesh. Kemi bashkëpunuar prej vitesh, që në kohën e ministrisë kur përfaqësonte një pjesë të të përndjekurve nga Tirana për çështjen e hapjes së dosjeve. Ka qenë jashtëzakonisht aktiv në emërtimet dhe shumë propozime që kemi marrë jo vetëm nga njësia 8, ku ai ka qenë aktiv, po edhe shumë njësi të tjera që përfaqësonin figurat e ndritura të Tiranës.
Eshtë në nderin e këtij këshilli që të kemi një emërtesë për atë që ka qenë propozuesi i shumicës së emërtesave të tironsëve të vjetër dhe me eksperiencë dhe për mikun tonë Arben Tafaj. Kur të jetë momenti i duhur, të gjitha grupet e përfaqësuara në Këshill Bashkiak, besoj se do të jemi i një zëri për të nderuar mikun tonë. Një kujtesë që pavarësisht bindjeve politike, teserave të ndryshme që mbajmë njerëzilliku duhet të triumfojë. Edhe njerzillëku ishte ndoshta karakteristika më e veçantë e tij. Kush e njihte e kuptonte që përtej njerzillikut nuk vinte asnjë dallim tjetër”, theksoi Veliaj.
Lajmi kryesor:
Vendimet e Këshillit Bashkiak të Tiranës/ Tek Unaza e Madhe zonë e dedikuar për banesa sociale! Teatri te liqeni do të mbajë emrin e Mirush Kabashit
G.K/ReportTv.al