Partitë e reja përballë partive të vjetra ishte tema që u diskutua në Report TV me analistin Mentor Kikia.
Në "Sot Live në Shqipëri", Kikia tha se partitë e vjetra nuk kanë përpjekje për të ngritur institucione vote, siç e quajti ai, dhe ndaj kjo, sipas analistit, prodhon qasje të padobishme. Nga ana tjetër, Kikia tha se strukturat e partive përfundojnë në ‘klube miqsh’, ‘struktura private’ dhe kryetarët kthehen në ‘CEO’.
Kikia: Partitë e vjetra nuk janë të kalcifikuara vetëm për shkak të moshës që drejton, por janë të kalcifikuara për shkak të mungesës së demokracisë së brendshme, mungesës së strukturës, mungesës së njerëzve që zgjidhen përmes votës, apo edhe aty ku ka përpjekje për të ngritur institucione vote, sërish ato rezultojnë të padobishme. E në këtë kontekst, partitë e reja do duhet t’i kundërvihen kësaj fryme, kësaj qasjeje të vjetër, për të sjellë një marrëdhënie politike, një strukturë ku mund të aderojë kushdo që gjen aty aspiratat e veta dhe jo struktura apo organizata që shndërrohen në klube miqsh apo që shndërrohen në struktura private të njërit apo të tjetrit, që më pas marrin natyrën e një biznesi dhe kryetari kthehet në një lloj CEO.
Kikia ka komentuar partitë e reja, duke thënë se Qori, sipas tij, është i pozicionuar majtas dhe e mbron atë pozicion. Por ajo që Kikia theksoi ishte që, sipas tij, Lapaj dhe "Shqipëria Bëhet" nuk kanë një profil të qartë.
Kikia: Lëvizja Bashkë është një parti e pozicionuar majtas, e pozicionuar goxha majtas, dhe këtë e mbron si pozicionim. Agron Shehaj preferon të mbështesë shtresën e biznesit që të konsiderohet një parti e djathtë dhe këtë e bën në çdo mundësi që ka në komunikimin publik. Shqipëria Bëhet dhe Nisma duken si diçka e mesme, por pa një profil të qartë, i përkasin atij grupimi që quhet parti e qendrës.
Sipas analistit, partitë e reja ndodh që, në raportin e tyre me historinë e politikës shqiptare, të kthehen në vegla të partive të vjetra. Qasja për të marrë përfitime kryetarët i kthen ato në një ambient jo të besueshëm, sipas Kikisë.
Kikia: Partitë e reja duken sikur janë vegël e partive të vjetra dhe duket si diçka e paqartë që ndodh në ambientin e partive të reja. Kryetarët marrin atë përfitimin e vet dhe zhduken nga skena, dhe kjo është arsyeja që nuk shndërrohen në parti kolegjiale, por janë parti kryetarësh.
Komente
