TIRANE-Kolegji Zgjedhor ka pranuar kërkesën e Partisë Socialiste për të certifikuar këshillat bashkiakë. Sot janë certifikuar 7 bashki, ndërsa vendimi është marrë me shumicë absolute 5-0. Këshillat që u certifikuan sot janë të' Urës Vajgurore, Devollit, Kuçovës, Konispolit, Memaliajt, Përmetit dhe Poliçanit.
Komisioni Qendror i Zgjedhjeve nuk mund të certifikonte këshillat bashkiakë, pasi nuk kishte 5 votat e mundshme që duheshin duke qenë se në cdo vendim që është marrë për 30 Qershorin, kryetari i KQZ-së Klement Zguri ka votuar kundër. Përballë faktit se KQZ nuk mund të vendoste për këshillat, PS-ja iu drejtua Kolegjit duke marrë certifikimin ku nuk pati surpriza.
Ndërsa nesër do të shqyrtohen 13 të tjera, Mirditë, Finiq, Pukë, Pustec, Pogradec, Vau i Dejës, Mat, Fushë Arrëz, Delvinë, Roskovec, Kavajë, Dropull dhe Peqin.
Certifikimi i hap rrugë mbledhjes së parë të këshillave dhe betimit të kryetarit të ri të bashkisë për çdo njësi vendore. Opozita sot i dërgoi një letër Kolegjit Zgjedhor ku i kërkoi pezullimin e dhënies së mandateve për Këshillat Bashkiakë derisa Gjykata Kushtetuese të vendosë.
Komente
