Një hap pozitiv i Kombëtares shqiptare të femrave, teksa për herë të parë pasi ka kaluar raundin e parë eliminator të Botërorit, tashmë ka siguruar edhe fitoren e parë në historinë e vajzave të futbollit shqiptar.
Menjëherë pas rezultatit pozitiv të arritur në ndeshjen ndaj Polonisë, në atë barazim në transfertë me rezultatin 1-1, femrat e Kombëtares shqiptare kanë marrë një tjetër rezultat pozitiv me Bjellorusinë.
Skuadra e Grimës ka fituar me rezultatin 1-0, falë goli të Gjinit në minutën e 87-të. Pjesa e parë ka përfunduar me rezultatin 0-0, në një pjesë e cila ka folur me tepër për Shqipërinë, megjithëse femrat e Kombëtares nuk kanë arritur të konkretizojnë mundësitë e krijuara.
Ndërsa në pjesën e dytë Shqipëria ka sfiduar edhe fatin përveç kundërshtarit, pasi Maksuti dhe Bajraktari kanë goditur traversën në dy raste të ndryshme. Pas kësaj fitore, femrat e Kombëtares braktisin vendin e fundit dhe kalojnë Bjellorusinë.