Ministrja e Arsimit dhe Sportit, Ogerta Manastirliu u paraqit këtë të hënë në Prokurorinë e Posaçme. Report Tv mëson përmes burimeve se Manastirliu u paraqit në SPAK në cilësinë e personit që ka dijeni mbi çështjen e sterilizimit në kohën kur ka drejtuar Qendrën Spitalore Universitare Nënë Tereza.
Ministrja mësohet se qëndroi brenda ambienteve të SPAK për 2 orë e 15 minuta, ndërsa ishte e vetme. Për të njëjtën dosje po hetohet në masën “detyrim paraqitje” ish-ministri i Shëndetësisë, Ilir Beqaj, ndërsa të arrestuar prej gushtit 2023 janë biznesmeni Ilir Rrapaj dhe ish-zv/ministri i Shëndetësisë në kohën e Beqajt, Klodian Rrjepaj.
Në deklaratat publike pas dëshmive para prokurorëve të SPAK, Ilir Beqaj është shprehur se çështja për sterilizimin duhet të hetohet edhe më herët, gjatë kohës së qeverisjes nga e djathta.
