BEOGRAD, Serbi - Këtë 3 prill në Beograd është duke u mbajtur Kongresi i UEFA-s, organizmit evropian të futbollit. Fjalën hapëse e mbajti kreu i këtij institucioni, Aleksandër Ceferin.
Ish-presidenti i Federatës Sllovene, Ceferin tha se futbolli nuk ka kufij dhe solli shembullin e Shqipërisë dhe Serbisë që në verën e 2027 do bashkorganizojnë Europianin U-21.
"Ne e shikojmë një turne si Euro U-21, i organizuar bashkarisht nga Shqipëria dhe Serbia, si një shembull i shkëlqyer për të na kujtuar se nuk ka kufij të vërtetë në futbollin europian.
Futbolli është më shumë se një sport, ai është një pasqyrë dhe një model i shoqërisë. Ai flet një gjuhë universale që shkon përtej kufijve, bashkon komunitetet dhe frymëzon ëndrrat,” tha Ceferin në deklaratën e tij.
Kujtojmë se flamuri i Kosovës është duke u valëvitur përpara ndërtesës ku po zhvillohen punimet e këtij Kongresi. Që nga dita e djeshme aty janë vendosur 55 flamujt e vendeve anëtare të UEFA-s, mes të cilëve dhe flamuri i Kosovës.
Kjo është e para herë në historinë e konflikteve disa vjeçare mes dy vendeve që Serbia ngre flamurin e Kosovës dhe këtë e ka bërë nëpërmjet futbollit.
Komente
