KORÇË- Ngjarja e trishtë që ka tronditur mbarë opinionin publik, vrasja me thikë 14-vjeçarit Martin Cani nga shoku i shkollës, ka nisur të japë efektet e para e ndërgjegjësimit dhe e kontrolleve më të forta për sigurinë brenda institucionit të dijes.
Mësuesja e një shkolle 9-vjeçare në rrethin e Devollit mësoi nga nxënësit e saj se një fëmijë i shkollës, 13 vjeç mbante në çantë një biçak. Në prani të psikologes dhe stafit drejtues, iu kontrollua çanta, ku u zbulua biçaku, tashmë i sekuestruar nga policia. Nxënësi, i cili nuk ka shfaqur më parë probleme në sjellje në shkollë, është duke u pyetur në prani të prindit, psikologut dhe policisë, nën drejtimin e prokurorit.
Ndërkohë, në një tjetër rast, në Tiranë, forcat e policisë identifikuan një të mitur, po 13 vjeç, pas publikimit të një videoje se teksa mbante në duar një mjet prerës teksa luante me shokët në zonën e Porcelanit. Nga verifikimet e kryera, policia zbuloi se video e postuar në rrjet, është filmuar një muaj më parë.
Ditën e sotme, në bazë të informacionit të marrë nga një mësuese dhe nga ndihmësspecialisti i zonës, se në një shkollë 9-vjeçare në rrethin e Devollit, një nxënës 13 vjeç mbante në çantë, një mjet prerës (biçak), menjëherë mësuesja, në prani të psikologes dhe stafit drejtues të shkollës, ka kryer kontroll në çantën e 13-vjeçarit.
Nga kontrolli i çantës u gjet mjeti prerës (biçak), i cili u sekuestrua në cilësinë e provës materiale nga specialistët për Hetimin e Krimeve të Komisariatit të Policisë Devoll.
Nxënësi, i cili nuk ka shfaqur më parë probleme në sjellje në shkollë, është duke u pyetur në prani të prindit, psikologut dhe punonjësit social të shkollës, nga specialisti për Hetimin e Krimeve i Komisariatit të Policisë Devoll. Të gjitha veprimet po kryhen në drejtimin e prokurorit.
