KORÇE - Jo vetëm vendas por edhe të huaj, në Polenë për të shijuar festën e lakrorit me dy peta
Për mbi 4 orë, amvisat polenake përgatitën një prej gatimeve tradicionale korçare, duke u dhënë të pranishmëve mundësinë ta shohin nga afër mënyrën e veçantë të përgatitjes së lakrorit në saç.
Qindra lakrorë u gatuan dhe u poqën me kujdes dhe më pas u tregtuan për të gjithë ata që kishin vendosur të shijonin një “copëz” Korçe.
E pikërisht procesi i pjekjes në saç është ajo që bën diferencën e shijes së këtij lakrori pohojnë amvisat të cilat shtojnë se gjithçka përgatitet me produkte të zonës, të prodhuara nga vetë ata.
“Festa e lakrorit”, qe prej 15 vjetesh, vjen si një ndërthurje e shijes së lakrorit të gatuar në çast, një panairi ushqimesh tradicionale të fshatit Polenë si dhe të Korçës, por edhe argëtimit, muzikë, dhe repertorit të këngëtarit të mirënjohur Spiro Roko.
