Korçë- Një 37 vjeçar është vendosur në pranga pasi dyshohet se vodhi një shumë parash dhe sende shtëpiake në një banesë në Korçë.
Ka qenë pronari i shtëpisë ai që ka bërë denoncimin rreth orës 13:00 në Komisariat, duke deklaruar se mesditën e sotme pas kthimit nga Greqia ka parë se i kishin vjedhur në banesë televizorin, një shumë parash dhe sende të tjera, informoi sot policia.
Nga hetimet e kryera të uniformave blu rezultoi se hajduti ishte një burrë i cili në vitin 2021 ka qenë i dënuar për një seri vjedhjesh në qytet.
"Nga veprimet e shpejta hetimore të kryera në vendngjarje dhe informacionet e marra në rrugë operative nga Specialistët për Hetimin e Krimit, rezultoi se autori i dyshuar i vjedhjes ishte shtetasi E.B, 37 vjeç, banues në lagjen nr 3, Korçë, person i dënuar më parë për një seri vjedhjesh të ndodhura në Korçë gjatë vitit 2021.
Bazuar mbi këto dyshime, shërbimet e Policisë kanë shkuar në banesën e shtetasit E.B, për ta shoqëruar në Komisariat, si person i dyshuar për vjedhjen e ndodhur", thuhet në njoftimin e policisë.
Pasi oficerët shkuan në banesë dhe i thanë që duhet të vinte në komisariat burri ka përplasur derën duke thyer xhamin e saj dhe më pas ka tentuar të largohet nga dera e tualetit. Por tentativa e tij ka dështuar pasi u vendos në pranga.
Fillimisht ai u dërgua në spital për shkak se u dëmtua në dorë nga xhamat e derës dhe më pas u shoqërua në Polici për veprime të mëtejshme procedurale.
