Koreja e Veriut ka deklaruar se mund ta anullojë takimin me presidentin amerikan Donald Trump nëse SHBA-të këmbëngulin se ajo duhet të heqë dorë nga armët e saj bërthamore.
Takimi i shpallur prej kohësh ndërmjet Trumpit dhe Kim Jong Un-it të Koresë së Veriut pritte të zhvillohet më 12 qershor.
Por nëpërmjet një njoftimi plot inat, zv.ministri i Jashtëm i Koresë së Veriut i akuzoi SHBA-të se po bëjnë deklarata të pamatura dhe se kanë qëllime të këqija.
Ai e drejtoi gishtin ndaj këshilltarit të sigurisë kombëtare amerikane John Bolton.
"Nuk i fshehim ndjenjat tona të neverisë ndaj tij,” – tha Kim Kye-gwan.
Takimi mes Kim Jong Un dhe Donald Trump u caktua pasi Koreja e Veriut tha se ishte e angazhuar që ta denuklearizonte gadishullin korean.
Se çfarë nënkuptonte konkretisht me këtë mbeti e paqartë, por Koreja e Veriut i ka ftuar mediat e huaja më herët gjatë muajit që të marrin pjesë në çmontimin e bazave kryesore te tësteve të saj bërthamore.
Gazetarja e BBC-së në Seul Laura Bicker thotë se Koreja e Veriut – që ka thënë për një kohë të gjatë se arsenali i saj bërthamor është thelbësor për mbijetesën e Veriut si shtet – po i bën tani të qarta kërkesat e saj.
Në deklaratën e Kim Kye-gwan, të shfaqur nga televizioni shtetëror, thuhet se nëse SHBA-të “na vënë në qoshe dhe na kërkojnë që të heqim dorë nga armët bërthamore ne nuk do të kemi më ndonjë interes që të bisedojmë dhe duhet ta rivlerësojmë takimin e 12 qershorit”.
Ai tha se Koreja e Veriut vazhdon të ketë “shpresa të larta” por se ishte “tejet e papërshtatshme që SHBA-të po na provokojnë përpara takimit duke bërë deklarata qesharake”.
Këshilltari amerikan i sigurisë që u sulmua verbalisht nga Koreja e Veriut kishte thënë në disa intervista në fund-javë se Veriut duhet të ndiqte modelin libian të çarmatimit bërthamor. Libia e Gedafit kishte dorëzuar armët e saj në këmbim të marrjes së ndihmës ekonomike.
Korrespondentja e BBC-së tha se koreano-veriorët po e ndiqnin me vëmendje dhe nuk u pëlqeu ajo se çfarë dëgjuan prej tij.