Situata e koronavirusit në Greqi vijon të jetë alarmante. Gjatë 24 orëve të fundit janë regjistruar 6,424 raste të reja me koronavirus, gati trefishim në krahasim me një ditë më parë. Që prej fillimit të pandemisë në Greqi janë regjistruar 1,044,301 raste me koronavirus.
Në 24 orët e fundit në vend janë shënuar 77 viktima ndërsa prej fillimit të pandemisë janë regjistruar 20,055 vdekje nga COVID.
Greqia pak ditë më parë ka vendosur masa të reja anti-COVID. Çdo person që do të hyjë në territorin e Greqisë përveç certifikatës së vaksinimit duhet të ketë edhe një test negativ të koronavirusit të 48 orëve të fundit.
Këto masa kanë hyrë në fuqi pas rritjes së infektimeve dhe përhapjes së variantit 'Omicron', variant i cili ka shkaktuar rritje të infektimeve në të gjithë botën.
