Transmetuesi ‘Russia Today’ (RT) i financuar nga shteti rus ka bërë një deklaratë të martën se po lançonte një version në gjuhën serbe. Transmetuesi, i cili u pezullua në Bashkimin Evropian në fillim të këtij viti pas pushtimit rus të Ukrainës, tha se dega e tij e re do të mbulojë "ngjarjet më të ngutshme rajonale dhe botërore nga një këndvështrim alternativ".
Ndërsa Rusia ka qenë gjithnjë e më e izoluar nga Perëndimi për shkak të pushtimit të Ukrainës, Moska ka kërkuar lidhje më të ngushta me aleatët tradicionalë si Serbia, një komb tjetër i krishterë ortodoks. Një faqe interneti e lajmeve e quajtur RT Balkan tashmë është duke funksionuar dhe RT planifikon të fillojë transmetimet televizive në gjuhën lokale jo më vonë se 2024, sipas deklaratës. Kryeredaktorja e RT Margarita Simonyan shkroi në Tëitter se: "Ne kemi nisur RT në Ballkan. Sepse Kosova është Serbi."
Media do të drejtohet nga Jelena Milincic, vajza e Ljubica Milincic, redaktore e agjencisë ruse të lajmeve Sputnik, e financuar nga shteti, e cila e përshkroi veten si "pro-ruse dhe të orientuar pro-Putin" në një intervistë në fillim të këtij viti. Jelena Milincic ka punuar më parë për RT Spanish në Moskë dhe gjithashtu ka drejtuar një shfaqje të quajtur "Propaganda" në kanalin televiziv rus NTV të kontrolluar nga shteti.
BE-ja pezulloi shpërndarjen e Russian Today English, Russia Today MB, Russia Today Gjermani, Russia Today France, Russia Today spanjisht dhe Sputnik në mars pas sulmit rus në Ukrainë.
