KOSOVË- Nazlie Mehmetaj, nëna e Nezir Mehmetaj, i arrestuar nga serbët, ka rëfyer me detaje gjithçka ka ndodhur në doganën në Merdare, kur djali i saj u prangos. Në një intervistë për T7 në Kosovë, Nazlie Mehmetaj shprehet se ajo ishte nisur drejt Nishit të Serbisë për t'u kuruar, por nga ai udhëtim u kthye pa djalin.
"I thashë jo mor bir, mos të shkojmë atje, ai tha jo s'na ndodh gjë, ça u kemi bërë atyre. Kur kaluam aty, nuk u vonuam fare. Na panë dokumentet, u dhamë letërnjoftimet, i kishim të gjitha në rregull. Na lëshuan tri dokumente që ishin për të hyrë e për të dalë", tregon Nazlia.
Gjithçka kishte shkuar mirë, por në kthim dokumentet që ua kishin dhënë vetë serbët në doganë, u kishin hapur probleme.
"Na thonin kush ta ka lëshuar këtë letër, atë që e lëshuan vetë. U thamë që "ju na e keni lëshuar" dhe thirrën policë të tjerë, thirrën një, thirrën një. E pyetën si e ka emrin baba yt. Tretën herë që e thirrën, i tha "Nezir a po vjen me ne", ai i tha "po". Prita, prita, por kurrgjë. Thashë sado të vonohem do e pres", rrëfen Nazlie.
Duke qenë se Nezir Mehmetaj ishte larguar nga Kosova kur ishte vetëm 17-vjeç (sot 49-vjeç) për të jetuar në Zvicër dhe nuk ka qenë as gjatë luftës në Kosovë, nëna ngre dyshime se arrestimi ka ardhur për shkak të bashkëshortit të saj.
"Baba i vet ka qenë i arrestuar, ndenji në burg 2 vjet e gjysmë", tha ajo. Ajo është në pritje të një lajmi të mirë për Nezir Mehmetaj, për të cilin është ngritur shteti në këmbë, teksa ka treguar edhe mesazhin e fundit që ka marrë nga djali i saj. "Mos u mërzisni, se do më lëshojnë", ishte mesazhi i fundit i Nezir Mehmetajt me nënën e tij.
Komente
