Zgjedhja e nënkryetarit serb vazhdon të mbajë “peng” konstituimin e Kuvendit të Kosovës. Edhe seanca e sotme, që nisi në orën 11:00, dështoi pasi tre emrat e propozuar për këtë post nuk morën votat e nevojshme.
Dy deputetët e Listës Serbe, Miljana Nikolliç dhe Igor Simiç nuk morën asnjë votë në tri raunde votimi secili, pasi u hodhën në votim përmes shortit. Deputeti tjetër nga ky komunitet, Nenad Rashiç, gjithashtu nuk arriti të zgjidhej nënkryetar, pasi mori vetëm 56 vota pro, pesë më pak se 61 votat e nevojshme për t’u zgjedhur.
Kryetari i Kuvendit, Dimal Basha e konsideroi të mbyllur seancën konstituive, megjithëse rregullorja e punës së Kuvendit thotë se seanca konstuive përfundon me zgjedhjen e kryetarit dhe nënkryetarëve të Kuvendit. Ai njoftoi gjithashtu se do të thirrë mbledhjen e kryesisë së Kuvendit të hënën e 1 shtatorit, në orën 13:00.
“Në emër të funksionalizimit të Kuvendit dhe materializimit të rezultatit zgjedhor të 9 shkurtit, konsiderojnë se moszgjidhja e njërit prej gjashtë anëtarëve të kryesisë së Kuvendit nuk mund të bëhet pengesë që bllokon konstituimin e Kuvendit”, theksoi Basha.
Eugen Cakolli, nga Instituti Demokratik i Kosovës, theksoi se seanca konstituive nuk mund të konsiderohet e përmbyllur pa zgjedhjen e të gjithë nënkryetarëve. Sipas tij, kjo situatë zgjidhet vetëm nga gjykata.
“Kjo zgjidhet nga Gjykata – qoftë me konstatim të dështimit të konstituimit të Kuvendit brenda afatit 30-ditor, ose me shpallje të pavlefshme dhe përsëritje të procedurës së votimit për nënkryetarët e komuniteteve”, tha ai.
Një ditë më parë, presidentja Vjosa Osmani iu bëri thirrje partive parlamentare të gjejnë një zgjidhje në përputhje me Kushtetutën e vendit për të themeluar Kuvendin dhe qeverinë e re sa më shpejt të jetë e mundur.
Komente
