Ndërsa Komisioni Qendror i Zgjedhjeve prej dy ditësh po certifikon rezultatin e 11 majit me tabelat përmbledhëse (ka miratuar 8 dhe janë në proces 4 të fundit), Partia Demokratike nuk tërhiqet nga e saja duke kontestuar.
Së fundmi PD-ADSHM i janë drejtuar KQZ-së me një kërkesë zyrtare në 5 pika, ku kërkon konkretisht që t’i dërgojë informacion në lidhje me qarqet ku është certifikuar rezultati.
PD ka ngritur pretendime të shumta, por deri tani pa ndonjë provë konkrete si rasti me ‘trenin bullgar’, se votat u blenë apo manipuluan. Aktualisht ajo kërkon të dhënat për zarfet e diasporës dhe procedurat e dorëzimit nga kompania postare, procesverbalet për çdo qendër votimi apo KZAZ, dokumente dhe raporte apo regjistra.
“Subjekti zgjedhor, koalicioni Partia Demokratike–Aleanca për Shqipërinë Madhështore (PD–ASHM), për efekt të ushtrimit efektiv të së drejtës së ankimit të saj, ndaj vendimeve tuaja për miratimin e tabelave të rezultateve të miratuara nga ana juaj, kërkon nga KQZ – për secilin Qark që KQZ ka miratuar rezultatet – vënien urgjentisht në dispozicion të provave”, thuhet mes të tjerash në kërkesën e PD.
Gjithashtu PD ka bërë kërkesë në KQZ edhe për rastin e Peqinit, ku PD pretendon se kapi 10 fletë votimi nëpërmjet të cilave akuzon se është aplikuar 'treni bullgar' nga një lokal fshati në këtë zonë dhe që sipas Policisë rezultuan se ishin fletë të rreme. PD shprehet në kërkesën e dorëzuar nga Franc Nuri se do një ekspertizë shtesë mbi ato fletë.
(Kliko ketu per te lexuar dokumentin e plote)
Komente
