Kremlini tha këtë të hënë se presidenti i Rusisë, Vladimir Putin nuk ishte i përfshirë në vendimin për t’ia dorëzuar trupin e Navalnyt familjes së tij, siç raporton CNN.
Navalny ndërroi jetë teksa kryente dënimin në koloninë penale më 16 shkurt dhe familja e tij prej ditësh i kërkonte autoriteteve ruse t’i jepnin trupin e tij.
Të premten, autoritetet ruse pranuan të dorëzojnë trupin e kritikut të Kremlinit.
Duke folur në konferencën e zakonshme me gazetarët, zëdhënësi i Kremlinit, Dmitry Peskov i cilësoi akuzat e nënës së Navalnyt, Lyudmila Navalnaya për shantazh dhe për sugjerimin e një funerali sekret për Alexein si “absurde”, duke shtuar se Kremlini “nuk ka patur lidhje” me çështjen dhe prandaj “nuk mund të ushtroj presion”.
Të shtunën, ekipi i Navalnyt raportoi se trupi tashmë iu kthye familjes. Planet për funeralin e tij mbeten ende të paqarta.
