Në kuadër të konsolidimit të marrëdhënieve midis Kontrollit të Lartë të Shtetit dhe institucioneve italiane, kryetari i KLSH-së, Arben Shehu, priti sot në një takim ambasadorin italian, Marco Alberti.
Gjatë këtij takimi kreu i KLSH-së shprehu mirënjohjen e tij mbi mbështetjen e dhënë nga institucionet italiane në punën e KLSH-së dhe nënvizoi nevojën për konsolidimin e mëtejshëm të marrëdhënieve dypalëshe.
Nga ana e tij, ambasadori Italian shprehu vlerësimin maksimal për punën e institucionit duke shprehur dakordësinë për të thelluar bashkëpunimin institucional për të promovuar më tej shkëmbimin e frytshëm të eksperiencave në fushat e përbashkëta të bashkëpunimit.
Duke iu drejtuar Kryetarit Shehu, Ambasadori Alberti e cilësoi rolin e KLSH-së si themelor në procesin e integrimit europian të Shqipërisë.
"Ju, zoti kryetar, zini një vend delikat në strukturën dhe arkitekturën e shtetit, mbi të gjitha në dimensionin e negociatave për hyrjen e Shqipërisë në Bashkimin Europian, ku transparenca, rregullsia, saktësia, përgjegjshmëria dhe sistemi i llogarive publike luajnë një rol thelbësor",- u shpreh ambasadori italian në Tiranë.
Gjithashtu, u komunikua për rritjen e prezencës së stafit të KLSH në institucionet italiane si Guardia di Finanza dhe Policia Italiane për marrjen e eksperiencave më të mira në hetimin financiar.
Në takim mori pjesë edhe përfaqësues i Guardia di Finanza për Shqipërinë, Kosovën dhe Malin e Zi, Kolonel Giampiero Carrieri.
Komente
