Kryetari i Prezencës së OSBE-së në Shqipëri, Vincenzo Del Monaco, zhvilloi ditën e sotme takimin e parë në Gjykatën Kushtetuese me Kryetaren aktuale, Vitore Tusha.
Në njoftimin e shpërndarë nga OSBE bëhet me dije se fokusi i takimi ishte njohja dhe diskutimi për fuqizimin e bashkëpunimit mes Prezencës dhe këtij institucioni thelbësor për respektimin e shtetit të së drejtës dhe të të drejtave themelore të njeriut në Shqipëri.
"Kohët e fundit, Prezenca e mbështeti Gjykatën në hartimin e një strategjie shumëvjeçare dhe të një plani veprimi, me synimin për të siguruar efikasitetin dhe transparencën e Gjykatës Kushtetuese dhe për të kontribuuar në zbatimin e reformës në drejtësi. Del Monaco i uroi suksese anëtarit më të ri të Gjykatës, Altin Binaj, i cili u betua dje, dhe shprehu besimin e tij se bashkëpunimi mes institucioneve përkatëse do ta bëjë Gjykatën Kushtetuese plotësisht funksionale shumë shpejt. Ai theksoi se Prezenca mbetet e gatshme të vijojë të ndihmojë Gjykatën për të rritur efikasitetin dhe transparencën e saj", njofton për takimin OSBE.
