Janë 30 vizatime në teknikën e sepias dhe 100 vizatime në teknikën laps dhe tush me autor piktorin Gazmend Leka dhe që vijnë për publikun të ekspozuara për herë të parë në galerinë e artit “Vilson Kilica” në Fier. Vizatimet përbëjnë një seri të jashtëzakonshme subjektesh e temash të realizuara 3 vitet e fundit dhe që përshkruajnë krijimtarinë e Lekës në katër dekada.
“Është një lloj tërheqjeje magjike, që unë kam ndaj vizatimit. Janë motive, që i kam trajtuar gjatë 45 viteve të mia të krijimtarisë. Kam marrë gjithë shenjat, simbolet dhe i kam rindërtuar në një mënyrë tjetër.”, - shprehet artisti.
Përshkruar nga shtresëzimet mitologjike të kulturës botërore ato zbërthejnë ato stacione ekzistenciale të njeriut aq sa dhe të krijuesit. Por, pjesë e ekspozitës është dhe figura femërore me disa nudo.
“Ato janë të periudhës kur unë kam bërë një ekspozitë në Tiranë, që e titulloja ‘Kaloi një grua’, por nuk i prezantova atje, i bëra disi më vonë ato vizatime.”, - tregon Leka.
Kjo është e disata herë që piktori Gazmend Leka ekspozon në Fier, pasi siç vëren artisti, ky qytet ka galerinë më të mirë që ekziston sot për sot në Shqipëri, jo vetëm si ndërtesë, por dhe përsa i përket trajtimit që i bën artistit. Ekspozita do të qëndrojë e çelur deri më 20 nëntor.
