Nuk do të ketë më pauza humanitare në sulmet ndaj qytetit të Gazës, që nga kjo e premte, kryeqyteti i Rripit është shndërruar në një zonë lufte njofton ushtria izraelite. Pauzat humanitare do të vlerësohen sipas situatës dhe direktivave në nivel politik thotë IDF-ja.
Për shkak të përshkallëzimit, Britania e Madhe ka ndaluar pjesëmarrjen e zyrtarëve izraelitë në panairin ndërkombëtar tregtar të mbrojtjes. Ofensiva e afërt e ushtrisë izraelite në Gaza mund të zhvendosë një milion palestinezë të tjerë dhe "çdo përshkallëzim i mëtejshëm do të përkeqësonte vuajtjet dhe do të shtynte më shumë njerëz drejt katastrofës", paralajmëron Agjencia e Kombeve të Bashkuara për refugjatët palestinezë, UNRWA.
Sulmet e nisura mëngjesin e 29 gushtit, kanë lënë një numër të madh të vrarësh, në mbi 41 persona. 5 prej tyre në Al-Mawasi, e caktuar nga Izraeli si zonë e sigurt humanitare. Ushtria njofton se në Izrael kanë mbërritur trupat e dy personave të zhdukur që nga 7 tetori 2023. Një nga dy të vdekurit është Ilan Weiss. 55-vjeçari, banor i Kibbutz Be'eri, në Izraelin jugor, u rrëmbye nga shtëpia e tij dhe u vra gjatë sulmit ndërkufitar të 7 tetorit 2023 nga Hamasi. Presidenti izraelit Isaac Herzog i shprehu "ngushëllimet dhe mbështetjen e tij të përzemërt" familjes së pengut të vrarë.
"Fushata për kthimin e pengjeve vazhdon pa u ndalur dhe ne nuk do të ndalemi derisa t'i kemi sjellë të gjithë pengjet në shtëpi, si të gjallë ashtu edhe të vdekur.", tha në një deklaratë kryeministri izraelit Benjamin Netanyahu. Me gjetjen e trupit të Weiss, Izraeli thotë se 49 pengje mbeten në Gaza, nga të cilët besohet se vetëm 20 janë gjallë.
Ministri izraelit i Financave, Bezalel Smotrich i ka bërë thirrje qeverisë të fillojë aneksimin e pjesëve të Rripit të Gazës nëse Hamasi vazhdon të refuzojë të dorëzojë armët. Ministri i ekstremit të djathtë, i cili ka kundërshtuar hapur një marrëveshje me Hamasin për t'i dhënë fund luftës, prezantoi planin e tij për të "fituar Gazën deri në fund të vitit" në një konferencë për shtyp në Jerusalem.
Sipas propozimit të Smotrich, Hamasit do t'i jepet një ultimatum për t'u dorëzuar, çarmatosur dhe liruar pengjet që mbahen ende në Gaza që nga sulmi i grupit në tetor 2023 që shkaktoi luftën. Nëse Hamasi refuzon, Smotrich tha se Izraeli do të aneksojë një pjesë të territorit çdo javë për katër javë, duke e sjellë pjesën më të madhe të Rripit nën kontrollin e plotë izraelit.
Sipas Smotrich, palestinezëve së pari do t'u urdhërohet të lëvizin në jug të Gazës, pastaj Izraeli do të vendosë një rrethim në veri dhe qendër të territorit për të mposhtur çdo militant të mbetur të Hamasit dhe më pas do të përfundojë me aneksimin.
"Ky objektiv mund të arrihet brenda tre ose katër muajsh", tha ai.
Komente
