Në fushën e Myzeqesë, një nga zonat më të njohura për prodhimin bujqësor në vend, po vërehet një rënie drastike e sipërfaqeve të mbjella me bostanore, kryesisht me shalqi.
“Report TV” kreu vëzhgim në fshatrat Suk, Frakull dhe Levan, ku mungesa e tregut, ndryshimet klimatike dhe mungesa e fuqisë punëtore po çojnë fermerët drejt braktisjes së kësaj kulture bujqësore. Kjo ka bërë që edhe sipërfaqja e kultivuar me shalqi të reduktohet ndjeshëm në zonën e Myzeqesë.
Në fshatin Suk 1, të Roskovecit, fermeri Saimir Kodheli thotë se nga 5 ha që kishte mbjellë vitin e kaluar, këtë vit ka mbjelle vetëm 2 ha.
“Nuk kisha leverdi ta mbillja me 110 lekë të vjetra dhe nga 5 hektarë bëra 2 hektarë. Ja dhe serrat aty, gjitha ai trangull i mbetur”, shprehet ai për televizionin.
E njëjta situatë paraqitet në njesive administrative Frakull, e njohur jo vetëm për kultivimin e luleshtrydhes, por dhe të bostanoreve.
Sipas agronomit Erando Troka, nga 230 ha sipërfaqja e mbjellë me shalqi sivjet është reduktuar në 130 ha.
“Ka tre arsye kryesore; mungesa e tregut, kushtet atmosferike dhe mungesa e fuqisë punëtore. Këto faktorë çojnë në përgjysmimin e të mbjellave, jo vetëm me shalqi, por edhe luleshtrydhe, domate, spec, kastravecë etj., që kultivoheshin më parë”.
Rënia e sipërfaqeve të kultivuara vihet re në të gjitha kulturat bujqësore ndaj apelon institucionet përgjegjëse të mbështesin fermerët. Po kështu dhe në fshatrat e njësisë administrative Levan, sipërfaqet e kultivuara me bostanore janë reduktuar ndjeshëm.
Fermeri Enver Selamaj thotë se nga 7 dynym që mbolli sezonin e kaluar, këtë sezon ka mbjellë vetëm 1 dynym.
“Kam pas mbjell bostan dhe perime me sipërfaqe të mëdha dhe punëtorë, 10 apo 12, kurse përsa i përket bostanoreve vjet kemi dalë me humbje”.
Përballë kësaj situate fermerët kërkojnë politika mbështetëse nga Qeveria, pasi kultivimi i bostanoreve në këto zona do të reduktohet tërësisht dhe do të mbillet vetëm sa për konsum familjar, ndërkohë që sipërfaqe të tëra rrezikojnë të mbeten djerrë.
Komente
Se pari mos mbillni siperfaqet vetem me nje lloj prodhimi,e jo me sasi te medha.Se dyti,ndiqni me kujdes tregun,tarifat.Mbillni soje.Ne pamje te pare nuk eshte nje bime shume e njohur ne tregun shqiptar,por eshte fitimprurese se jep mjaft prodhim dhe e keni tregun e saj-Kinen-te sigurte.Para tarifave, U.S ishte eksportuesi kryesor i sojes ne Kine,por qe kur u vendosen tarifat,Kina eshte detyruar te gjeje tregje te tjera ku t'a bleje.Ka ardhur koha qe fermeret te hyjne ne tregun e sojes.Prej sojes nxirret kryesisht qumeshti i sojes,qe po te ishin mundesite e perpunimit,mund te gjente treg dhe ne Shqiperi e BE,gjithashtu prodhohet dhe nje imitues djathi-Tofu,mjaft i perdorur ne Azine e larget,por dhe ne dieten vegane ne pergjithesi.Se treti,minimumi qe mund te beje shteti eshte orientimi vjetor i mbjelljeve duke i orientuar fermeret ne baze te klimes,tregut e farave,hibrideve.Soja ishte vetem nje shembull,por ka plot bime te tjera qe mund te sjellin fitim po te kete nje guide orientuese.
Përgjigju