Italia vijon të përballet me një krizë politike e institucionale, që pas zgjedhjeve të 4 marsit, teksa deri më tani kanë dështuar të gjitha përpjekjet për krijimin e një qeverie.
Kryeministri i ngarkuar për krijimin e një qeverie teknike, Carlo Cottarelli është takuar mëngjesin e sotëm me Presidentin Sergio Mattarella, një takim që nuk ka prodhuar asgjë të re.
Ka qenë vetë kryeministri i mandatuar nga Presidenti, Cottarelli, i cili ka deklaruar pas takimit se së bashku me Kreun e Shtetit janë në pritje për zhvillimet e reja.
Janë shfaqur mundësi të reja për lindjen e një qeverie politike. Përballë tensionit të tregut ekonomik e financiar italian, jemi në pritje për zhvillimet e reja.
Kryeministri i mandatuar, Carlo Cottarelli
Kriza politike ka shqetësuar të gjitha forcat politike, të cilat kanë reaguar, duke kërkuar rikthimin e menjëhershëm në zgjedhje. Lideri i ‘5 Yjeve’, Lugi Di Maio, dhe kreu i ‘Lidhjes’, Matteo Salvini, i kanë bërë thirrje Presidentit të japë datën e zgjedhjeve, në mënyrë që italianët të bëjnë vetë drejtësi.
Italia nuk është skllav i askujt. Gjermania të merret me hallet e gjermanëve, Franca me hallet e francezëve, për italianët mendojmë vetë. Mattarella na thuaj si të dalim nga ky kaos?
Lideri i ‘5 Yjeve’, Lugi Di Maio
President na jep datën e zgjedhjeve të reja dhe italianët me votën e tyre do bëjnë drejtësi për atë çka po ndodh sot.
kreu i ‘Lidhjes’, Matteo Salvini