Fabio Grosso është shkarkuar nga posti i trajnerit të Lyon në Ligue I të Francës. Legjenda e Italisë, i cili fitoi Kupën e Botës me të kaltërit në vitin 2006, kaloi një kohë të vështirë në krye të gjigantëve francezë.
Pasi mori drejtimin nga Laurent Blanc në shtator, italiani arriti vetëm një fitore nga shtatë ndeshje të ligës. Ai i drejtoi ndeshjet e fundit me një fytyrë dukshëm të mavijosur dhe të qepur pas një sulmi në autobusin e ekipit të Lyon nga tifozët e Marsejës në tetor. Italiani ishte me fat që nuk humbi shikimin pasi pësoi një plagë të madhe mbi sy, kur gurët e hedhur nga huliganët thyen xhamat e autobusit të ekipit përpara ndeshjes.
Pas kthimit nga lëndimet, Grosso regjistroi suksesin e tij të parë si trajner i Lyonit në një fitore 1-0 ndaj Rennes para pushimit ndërkombëtar. Humbja 2-0 ndaj Lille këtë fundjavë u gjykua si pika e fundit nga bordi i Lyonit.
L'Equipe raporton se ai u shkarkua nga pronari amerikan John Textor pas një takimi këtë mëngjes. Pavarësisht se mori mbështetjen publike të Textor javën e kaluar, pozicioni i Grosso-s në dhomën e zhveshjes së Lyon thuhet se u dobësua nga trajtimi i tij ndaj yjeve Alexandre Lacazette dhe Ryan Cherki.
Shtatë herë kampionët e Francës janë aktualisht në fund të Ligue 1 dhe janë pesë pikë larg zonës së shpëtimit, duke dëshmuar një sezon katastrofik.
