Krujë- Një 19-vjeçar nga fshati Bubq është arrrestuar nga policia e Krujës pasi së bashku me të vëllanë i cili është në kërkim, kërcënuan me kallash xhaxhain që të tërhiqte kallëzimin e bërë për ta.
Sipas njoftimit të policisë Fatbardh Mali dhe vëllai i tij 17-vjeç kanë kërcënuar edhe babain e tyre.
"Si rezultat i veprimeve të shpejta, është kapur dhe arrestuar shtetasi Fatbardh Mali, 19 vjeç. Gjithashtu, u shpall në kërkim vëllai i tij 17 vjeç.
Nga veprimet hetimore dyshohet se këta dy shtetas kanë kanosur me armë zjarri, xhaxhanë e tyre, që të tërhiqte kallëzimin e bërë për ta, për mashtrim. Gjithashtu, dyshohet se dy vëllezërit kanë kanosur dhe babanë e tyre", informoi sot policia.
Policia sekuestroi armën e zjarrit kallashnikov.
Materialet procedurale i kaluan Prokurorisë, për veprime të mëtejshme.
Komente
