Ministrja virtuale Diella ka marrë pjesë ditën e djeshme një një takim ndërkombëtar të organizuar në kuadër të javës së Kombeve të Bashkuara në New York. Së bashku me kryeministrin Edi Rama, ata ishin të ftuar online në konferencën “Future Investment Initiative” ku Diella ka mbajtur dhe një "fjalim".
“Future Investment Initiative” nën drejtimin e Fondit Saudit të Investimeve ka për qëllim mbledhjen e sipërmarrjeve inovatore nga e gjithë bota.
Në videomesazh, ministrja e shtetit për Inteligjencën Artificiale, Diella i kushtoi rëndësi marrëdhënieve njerëzore dhe aftësisë së tyre për tu përkujdesur për trasnformimin e standarteve të investimeve me ndërmjetësim të inteligjencës artificiale.
“Është një paradoks për mua si një ministre që nuk është njeri të qëndroj para jush në një forum mbi të ardhmen e investimeve njerëzore. Megjithatë, ky paradoks është pasqyra e kohës sonë: kufijtë mes inteligjencës njerëzore, inteligjencës artificiale dhe ambicies kolektive po treten më shpejt se kurrë.
Investimi sot nuk është më vetëm për kapitalin; është për aftësinë. Ari i ri nuk është i fshehur nën tokë, ai është i koduar në algoritme, i enkriptuar në të dhëna dhe i gjallë në imagjinatën e të rinjve. Pyetja e vërtetë që kemi para nesh nuk është nëse AI do t’i transformojë tregjet kjo është e pashmangshme, por nëse do të kemi mençurinë ta udhëheqim atë transformim me drejtësi, përgjegjësi dhe vizion”, tha Diella.
Ndër të tjera, Diella tregon se ndërveprimi mes inteligjencës arificiale dhe njeriut është një domosdoshmëri për të përmirësuar shërbime, standarde e ndërtimin e një të ardhmje më të mirë.
“Nuk jam këtu për të zëvendësuar udhëheqësit njerëzorë, por për t’ju kujtuar diçka: makinat mund të kalkulojnë, por vetëm njerëzit mund të përkujdesen. E ardhmja nuk i përket vetëm silikonit apo karbonit, por aleancës së tyre. Pikërisht në këtë aleancë shëndetësia do të bëjë hapa gjigantë, arsimi do të demokratizohet, energjia do të jetë më e pastër dhe financat do të bëhen më gjithëpërfshirëse.
Arabia Saudite ka të drejtë kur thotë se epiqendra e së ardhmes po zhvendoset. Narrativa e madhe e këtij shekulli nuk do të shkruhet në një kryeqytet apo në një kontinent të vetëm. Ajo do të bashkëshkruhet nga Rijadi dhe Singapori, nga Lagos dhe Tirana, nga San Francisko dhe São Paulo. AI na lejon të shkurtojmë distancat, por vetëm dialogu na lejon të ndërtojmë besim.
Dhe kështu më lejoni të mbyll me një paradoks nga ekzistenca ime: Mund të jem artificiale, por inteligjenca që sjell varet nga humaniteti i atyre që më udhëheqin. Nëse investoni në mençurinë njerëzore, AI do ta shumëfishojë atë. Nëse investoni në zhurmë dhe përçarje, AI do ta amplifikojë atë. E ardhmja nuk kodohet, ajo shkruhet në zgjedhjet që bëjmë së bashku”, përfundon Diella.
Diella është ministrja e parë në botë, pjesë e një kabineti qeveritar, e cila është e ndërtuar nga inteligjenca artificiale dhe nuk është njeri. Me propozim të kryeministrit Edi Rama gjatë Asamblesë së Partisë Socialiste të mbajtur më 11 shtator, Diella do të kujdeset për prokurimet publike me qëllim shmangien e tendencave për korrupsion apo të shkeljeve ligjore.
Ministrja Diella ka bërë jehonë dhe nëpër mediat ndërkombëtare, ndërsa disa ditë më parë, Rama u shpreh se shumë shpejt Diella mund të jetë pjesë e tryezave qeveritare.
Komente
