Ministri i Mbrojtjes së Sllovakisë, Robert Kalinak, ka deklaruar se kryeministri Robert Fico i është nënshtruar një operacioni tjetër.
“Kryeministri sllovak Robert Fico i është nënshtruar një operacioni tjetër këtë mëngjes që zgjati dy orë e gjysmë”, tha ministri i Mbrojtjes, Robert Kalinak për gazetarët.
Më tej ministri i Mbrojtjes tregoi se gjendja shëndetësore e Ficos mbetet e rëndë.
Gjendja e tij shëndetësore është ende shumë e rëndë, ndoshta do të duhen disa ditë për të parë se si do të vazhdojë”, tha ai paraditen e sotme jashtë ambienteve të spitalit Banska Bistrica ku vijon të jetë i shtruar kryeministri.
Kryeministri sllovak Robert Fico kishte shkuar të mërkurën e 15 majit 2024 për të zhvilluar një takim me mbështetësit e tij jashtë Shtëpisë së Kulturës në qytetin Handlova rreth 150 kilometra larg kryeqytetit, Bratislavë kur u qëllua me 4 plumba, në gjoks, stomak, gjymtyrë dhe në arterie. Menjëherë pas incidentit policia arrestoi autorin e plagosjes, një shkrimtar 71-vjeçar, i identifikuar si Juraj Cintula.
Gjatë marrjes në pyetje autori deklaroi se e kreu këtë akt, sepse nuk ishte dakord me qeverisjen nën drejtimin e Ficos. Plagosja e rëndë e Robert Fico ka trazuar jo vetëm ujërat e politikës vendase por edhe asaj europiane që thonë se ngjarja mund të ketë ndikim në zgjedhjet europiane.
