Në Katedralen "Ngjallja e Krishtit" në Korçë, është mbajtur sot (10 janar) një ceremoni paraklis për shëndetin e Kryepeshkopit Anastas Janullatos.
Besimtarët e pranishëm u mblodhën për të lutur dhe kërkuar shërim për Kryepeshkopin, duke ndezur një qiri që simbolizonte shpresën dhe jetën.
Pjesëmarrja ka qenë e madhe, me qytetarë që kanë shprehur besimin e tyre për një rikuperim të shpejtë dhe të plotë, duke e mbështetur me lutje këtë moment të vështirë.
“Na vjen keq. Ta kaloj edhe këtë radhë Kryepeshkopi ynë për të gjitha të mirat që ka bërë për fenë ronë ortodokse. Zoti ta shërojë”, tha një qytetare.
"Urojmë të bëhet sa më mirë, pavarësisht moshës. Në radhë të parë ai është njeri", tha një besimtar tjetër.
"Na dhimbset shumë, shërim të shpejtë i dhëntë Zoti", u shpreh një tjetër.
Kryepiskopi Anastas fillimisht u shtrua më 30 dhjetor 2024 në një spital privat në Tiranë, për shkak të një viroze stine. Më pas gjendja e tij u përkeqësua për shkak edhe të një gjakderdhjeje në sistemin e aparatit tretës, për të cilën u dërgua në Athinë më 3 janar, ku u shtrua në spitalin Ungjillëzimi.
Prej kësaj date gjendja shëndetësore e Kryepiskopit është përkeqësuar, teksa mjekët kanë qenë skeptik edhe për një ndërhyrje kirurgjikale për shkak të moshës madhore të Fortlumturisë së tij (95 vjeç).
Komente
