Qytetarë të shumtë kryesisht emigrantë kanë pritur me orë të tëra në radhë për të aplikuar për pasaporta dhe karta identiteti. Radhët e gjata shihen në zyrat e ADISA-s dhe Postës Shqiptare në qytetin e Gjirokastrës. Qytetarët kërkojnë që të shtohet numri i sporteleve, ndërsa qëndrimi në radhë pa ruajtur distancën po kthehet në shqetësim edhe për përhapjen e Covid19.
Qytetarë të shumtë janë dyndur që në orët e para të mëngjesit në zyrat shërbimeve publike.
Që prej orës 6:00 janë vënë në radhë dhjetëra qytetarë kryesisht emigrantë që aplikojnë për dokumentet e identifikimit biometrik, pasaporta dhe karta identiteti.
"Nuk vendosin numra atje, që të vijë filan numër. S'ka organizim, çfarë të bëjmë. Kanë ardhur dhe punonjës të rendit, bërtitën e ikën edhe ata. Rrëmujë është", tha njëri nga qytetarët që po priste në radhë.
Orët e gjata të pritjes dhe mos respektimi i distancës ka shkaktuar edhe debate mes qytetarëve dhe punonjësve të rendit.
Ata shprehen se kanë ditë të tëra që vijnë dhe nuk mbarojnë punë për shkak të fluksit ndaj kërkohet që të shtohet numri i sporteleve.
"Kemi aplikuar që të mërkurën për pasaportë tre ditore, e sot është e hënë. Erdha të premten se më gënjyen atje brenda, më thanë që do të vish në dy pa një çerek. Këta mbyllen që në orën 1. Vij prapë sot, kam dy orë këtu, kam numrin 85", tha një tjetër qytetare.
Pothuajse e njëjta situatë vërehet edhe në zyrat e filialit të Postës Shqiptare në Gjirokastër, duke shtuar rrezikun për përhapjen e virusit corona.
Komente
Keta punonjesit e firmes private qe prodhojne pasaportat nuk jane te afte ti sherbejne qytetareve, policia duhet te mare masa dhe te gjobise firmen qe krijon rremuje
PërgjigjuMBANI MASKA DHE DISTANCE 2 M NGA NJERI-TJETRI....SE DO LINI KALAMAJTE RRUGEVE...
Përgjigju