Objekti i ish-filialit të Universitetit të Tiranës, në qytetin e Kukësit, që nga koha e mbylljes, katër vite më parë , është lënë në mëshirë të fatit, duke u kthyer në një vend ku mbizotërojnë ferrat, mbeturinat, por edhe grafitet.
Pamjet që shihni, i përkasin ambienteve të jashtme të objektit, e cila për më shumë se 7 vite i shërbeu qindra studentëve, të cilët përfunduan arsimin e lartë, të nivelit Bachelor, të tre degëve: Infermieri, Gjuhë e Huaj dhe Administrim Biznes.
E kisha si opsion, se Kukësi kishte më shumë gjallëri. Më shumë student, më shumë lëvizje më shumë punë. Ta shikosh tani në gjendje të mjerueshme. U organizuam me shoqërinë për ta pastruar se na ka ardhur keq për gjendjen ku ndodhet sot ky fakultet.
Shkëlqim Basha, ish student
Situata aktuale e objektit është një këmbanë alarmi, se shumë shpejt ajo mund të degradohet , duke u kthyer në një objekt pa vlerë, për shkak të abandonimit që i kanë bërë institucionet e shtetit. Banorët e qytetit të Kukësit, por edhe Hasit, Tropojës dhe Pukës, të cilët studionin në këtë filial, ngritën zërin për rihapjen e tij, madje edhe Bashkitë dhe Këshilli i Qarkut, por ky vendim nuk u rishikua .
Kjo ishte një gjë bashkëkohore për Kukësin, një e ardhme më e mirë. Sot, të gjithë pa Universitet, të gjithë kërkojmë të ikim të largohemi. Sillte ndryshim në përditshmëri.
Qytetar i Kukësit
Filiali i Universitetit të Tiranës në Kukës u çel në vitin 2007 me një numër të kufizuar studentësh. Vit pas viti, numri i tyre erdhi në rritje, ndërkohë që në vitin 2014, Ministria e Arsimit dhe Sportit vendosi mbylljen e tij.
Komente
