Aventura e Mirel Josës me skuadrën e Kukësit ka zgjatur shumë pak, pasi klubi verilindor ka njoftuar mbylljen e marrëveshjes me trajnerin kryeqytetas. Josa, i cili nuk e zgjati më shumë se 5 muaj në krye të Kukësit, ishte trajneri i tretë në këtë skuadër për sezonin që u mbyll.
“Futboll Klub Kukësi njofton se Mirel Josa nuk është me trajner i skuadrës sonë. Pas përfundimit të sezonit, trajneri Josa ka pasur një bisedë me drejtuesit e klubit dhe më pas është vendosur që të ndërpritet bashkëpunimi. Kukësi e falenderon trajnerin Josa për kontributin e dhënë dhe i uron suksese në karrierën e tij”, thuhet në një njoftim.
Skuadra e Kukësit e mbylli në vendin e gjashtë kampionatin, ndërsa u eliminua në çerekfinale në Kupën e Shqipërisë duke mos arritur objektivat e vendosur.
Ndërkohë lajme vijnë edhe në kampin e Partizanit, pasi klubi i kuq ka humbur përfundimisht Erald Çinarin. Futbollisti shkodran është zyrtarizuar si blerja e re e turqeve të Samsunsporit. Klubi që militon në Ligën e Parë ka firmosur për 3 vite me shqiptarin, ndërsa në 2024 palët do të kenë të drejtën të rinovojnë edhe për një vit tjetër.
Ne.k.//ReportTv.al