SHKODËR - Gjysmëfinalja e parë e Kupës së Shqipërisë mes Vllaznisë dhe Dinamos u mbyll pa gola në ‘Loro Boriçi’, me dy klubet që kanë lënë gjithçka të hapur për në sfidën e kthimit që zhvillohet më 23 prill, nga ku do mësohet një nga skuadrat finaliste.
NDESHJA - Në djepin e futbollit shqiptar dy skuadrat nuk u ngritën në lartësinë e emrave dhe në fund fitoi…frika. Sa për kronikë, ishte Zabërgja në pjesën e parë që pati një mundësi për Dinamon, por pa e shfrytëzuar.
Në fraksionin e dytë ishte Ildi Gruda për Vllazninë që kishte mundësinë më të mirë, por sërish pa gola. Tanimë me ndeshjen e kthimit tre javë larg, skuadrat do fokusohen në kampionat ku ndodhen në zonën ‘Final 4’, me sezonin që sa vjen e bëhet më i fortë në javët e fundit.
Sot në orën 19:00 në stadiumin e Rrogozhinës kampionët në fuqi të Kupës, Egnatia pret Partizanin në takimin e parë gjysmëfinal mes tyre.
Komente
