Kryeministri i Kosovës, Albin Kurti ka dhënë një intervistë për median italiane “AGI” këtë të shtunë ku ka bërë edhe një paralajmërim të fortë. Ai ndodhet në Kongresin e Parlamentit Evropian Socialist ku ka folur për AGI mbi disa tema si: Lista Serbe dhe lidhjet e saj të forta me Serbinë dhe Rusinë, për kufirin si dhe për politikën në rajon dhe Evropë.
“Ka ende probleme në kufirin me Serbinë. Fatkeqësisht ata që u pasuruan me luftën janë kthyer në kriminelë dhe vazhdojnë të pasurohen me bitcoin, drogë dhe armë. Ata e mbulojnë biznesin e tyre me ide nacionaliste, por janë ende kriminelë”, tha Kurti.
Nga ana tjetër ai akuzoi Listën Serbe për fashizëm.
“Ata flasin për nacionalizëm dhe patriotizëm, por në realitet kanë ide fashiste dhe lidhje me Vuçiçin dhe Putinin”.
Sa i takon përpjekjeve për anëtarësim në Bashkimin Evropian, Kurti shton:
“Nuk jemi ende zyrtarisht kandidatë për anëtarësim, por po bëjmë çmos që sa më shpejt t’i afrohemi Bashkimit Evropian”.
Në fund ai dha edhe një koment për Giorgia Meloni, kryeministren e Italisë.
“Duhet të jem i sinqertë. Në të kaluarën e konsideroja Giorgia Melonin të lidhur me të kaluarën e saj të djathtë, me fashizmin. Që kur u bë kryeministre kam vënë re marrëdhëniet e saj të shkëlqyera me Bidenin dhe SHBA-në, mbështetjen e palëkundur për Ukrainën. Jo kështu për Salvinin që ka marrëdhënie me Putinin”, përfundoi Kurti.
