Gentian Malindi, 45 vjeç, është personi në kërkim nga policia për 137 kilogramët e kokainës të kapura në kontenierë me banane në Portin e Durrësit. Gazetarja e Report Tv, Xhensila Kodra, raporton se ai ka qenë me dy të arrestuarit, Ardian Bega dhe Altin Mislihaka, por i ka shpëtuar policisë pasi ka kuptuar se në pakot me kokainë mund të kishte GPS. Oficeri i sigurisë ka hyrë Portin e Durrësit, Ardian Bega duke shkuar deri në kontenierët ku ka marrë disa pako me kokainë me porosi të Gentian Malindit. I shoqëruar edhe nga Altin Mislihaka, punëtor në anijen e peshkimit të Malindit, ata kanë dalë nga porti me disa pako me drogë, më tej i kanë transportuar në një automjet me targa franceze ku ka qenë edhe Gentian Malindi, pronar i një anije peshkimi, “Eniwej” dhe biznesmen i tregtimit të produkteve të detit. Por ky i fundit kur ka parë se paketimi ishte ndryshe nga çfarë ishte kërkuar, ka kuptuar se po ndiqeshin nga policia, dhe ka mundur të arratiset. Në pranga përfunduan vetëm dy personat që morën drogën nga kontenierët.
Sipas dëshmisë së dhënë nga një prej të arrestuarve, Ardian Begës, ata kanë hyrë në port nga ana e Urës së Dajlanit dhe kanë mundur të marrin disa nga pakot me drogë me porosi të Gentian Malindit. Rruga e tyre ka vijuar drejt Shkëmbit të Kavajës, kur gjatë ecjes kanë kuptuar se diçka nuk shkonte. Ishte pikërisht Gentian Malindi që kuptoi se në pakot e kokainës kishte edhe oriz. Sipas dëshmisë dhënë para oficerëve të Ardian Begës, Malindi u ka kërkuar të mos flasin pasi në automjet mund të kishte çip, ndërsa ka hedhur nga makina pakot e drogës në autostradë pranë një hoteli.
Gentian Malindi ka qenë edhe më herët i arrestuar dhe proceduar për drogë. Në qershor të vitit 2013, Malindi është arrestuar pasi në një furgon mallrash u gjet nga policia 500 kilogramë kanabis, në një operacion të koduar "Sfida". Por arrestimi i Gentian Malindit, u vlerësua i paligjshëm nga Gjykata e Durrësit, duke e liruar atë, dhe duke lënë në burg vetëm Ervis Bardhin nga Elbasani. Në seancat gjyqësore posedimin e lëndës narkotike e ka marrë përsipër Bardhi, duke rrëzuar akuzat ndaj Malindit. Çështja në atë kohë i kaloi për kompetencë Gjykatës së Kavajës. Malindi dhe Bardhi u arrestuan në zonën e plazhit në kufirin që ndan rrethet e Durrësit dhe Kavajës. Operacioni policor "Sfida" u deklarua se finalizoi me sukses hetimin disamujor të strukturës antidrogë në policinë e Durrësit, duke çuar në sekuestrimin e një furgoni mallrash tip “Mercedes Benz” me targa AA 938 AE, me 500 kg drogë. Droga vinte nga Lazarati dhe dyshohet se një pjesë e saj do të qëndronte për shpërndarje në tregun e brendshëm.
Në vitin 2015, ai ka akuzuar Policinë Kufitare se bënin kontrolle të vazhdueshme në anijen e tij për drogë. “Policia e Kufirit po ushtron kontrolle të vazhdueshme të përsëritura e pa arsye konkrete. Kontrollojnë për drogë në anijen time. Vijnë 20 punonjës policie dhe po më persekutojnë. Nuk jam kundër kontrollit, por jo atij me kosto ekonomike në xhepin tim!”, shrehej ai për mediat.
Sot ai kërkohet nga autoritet policore si porositës i një sasie të konsiderueshme kokaine, 137 kilogramë.
Gentian Malindi
Ilir Malindi
Gentian Malindi është djali i avokatit të njohur, Ilir Malindi. Babai i tij në një reagim ka mohuar përfshirjen e tij duke thënë se i biri nuk ka lidhje me drogën por kërkohet vetëm se dikush i ka përmendur emrin.
Lajmi kryesor:
137 kg kokainë në 4 kontenierët nga Ekuadori/ Pranga 2 pritësve në Durrës, si dolën pakot nga porti, DEA zëvendësoi drogën me oriz me GPS (FOTOT)
G.M./ReportTv.al