Pak ditë para mbajtjes së zgjedhjeve të parakohshme Kuvendi i Kosovës pritet të votojë sot Projektligjin për buxhetin e vitit 2021. Një nga kërkesat kryesore të qeverisë Hoti për të shmangur futjen e vendit në krizë më të thellë ekonomike.
Projektligji për buxhetin është dërguar në Kuvend nga ana e Qeverisë tashmë në largim dhe ka qenë në shqyrtim te Komisioni për buxhet .
Kuvendi i Kosovës pritet të shpërndahet, pasi Gjykata Kushtetuese e Kosovës, javën e kaluar, e ka shpallur jo kushtetuese mënyrën se si është zgjedhur Qeveria e udhëhequr nga Avdullah Hoti.
Bashkimi Evropian dhe mekanizma të tjerë kanë bërë thirrje që Kuvendi të mos shpërndahet pa u miratuar buxhetin e vitit të ardhshëm i cili kap vlerën e 2.4 miliardë eurove.
Nëse buxheti nuk miratohet deri më 31 dhjetor, Kuvendi, me anë të një vendimi, mund të autorizojë vazhdimin e zbatimit të Ligjit për ndarjet buxhetore të vitit të kaluar fiskal, por që mund të qëndrojë në fuqi jo më shumë se tre muaj në vitin e ardhshëm.
