Tiranë- Gjykata e Posaçme kalon për gjykim dosjen e kolumbianit Samir Rosales Rodriguez, anëtar i organizatës kriminale për laboratorin e kokainës në Frakull të Fierit, ende në arrati dhe i cilësuar si kimisti i grupit.
SPAK i kishte mbyllur hetimet dhe dërguar dosjen për proces që nga 20 dhjetori 2013, veprime të kryera në mungesë, pasi kolumbiani ndodhet ende në kërkim. Hetimet ndaj organizatës kishin nisur me procedimin penal nr. 141 të vitit 2022 kur u krye edhe operacioni policor.
Dosja për kolumbianin u mëvetësua, teksa anëtarët e tjerë të organizatës tashmë janë dënuar, përfshi edhe ish-kryekomunarin e Frakullës, Viktor Çervanaku dhe familjarët e tij.
Vendimi i GJKKO të shkallës së parë u mor ditën e sotme (19 Shkurt), nga gjyqtari i çështjes Erjon Çela, i cili pranoi kërkesën e Prokurorisë së Posaçme dhe dërgimin e dosjes për proces të zakonshëm. Ndaj kolumbianit ka edhe masë “arrest me burg” në mungesë, që prej 24 nëntorit 2022.
Ndaj Rodriguez rëndojnë akuza për kryerjen e veprave penale "trafikimi i narkotikëve" kryer në bashkëpunim në formën e posaçme të grupit të strukturuar kriminal, "grup i strukturuar kriminal", dhe "kryerja e veprave penale nga organizata kriminale dhe grupi i strukturuar kriminal".
Prokuroria Kundër Korrupsionit dhe Krimit të Organizuar kishte mbyllur hetimet e dosjes dhe në GJKKO prej dhjetorit 2023, në ngarkim të ish-kryetarit socialist të ish-komunës Frakull në Fier, Viktor Çervanaku dhe 10 personave të tjerë, të akuzuar për trafikimin nga Kolumbia të 485.5 kg kokainë të përzier me pleh kimik, mes tyre edhe kimisti kolumbian.
Komente
