Taulant Xhaka ka vendosur të tërhiqet nga futbolli pas përfundimit të këtij edicioni. Kjo do të ndodhë pas 13 sezonesh, 10 trofesh dhe mbi 400 ndeshjesh me Baselin.
Xhaka, i cili iu bashkua Baselit në vitin 2003 kur ishte vetëm 12 vjeç, ka arritur të shpallet kampion 6 herë dhe fituar Kupën 3 herë. Duke bërë njoftimin e tërheqjes, Xhaka theksoi se vendimi ka ardhur në momentin e duhur, pasi do të mbushte 34 vjeç në mars dhe e ka parë këtë si një mundësi të natyrshme për t’u tërhequr. 30 ndeshje dhe një gol për Xhakën me Kombëtaren.
“Gjithçka që kam qenë në gjendje të përjetoj me këtë klub deri më tani ende ndihet si një ëndërr për mua, veçanërisht si qytetar i Baselit. Unë kam qenë në gjendje të përjetoj kaq shumë momente të mrekullueshme në FC Basel, kam pasur kaq shumë shokë të shkëlqyer në dhomën e zhveshjes dhe kam qenë në gjendje të konkurroj kundër futbollistëve më të mirë në botë.
Ishte gjithmonë e rëndësishme për mua që të vendosja vetë se kur do të ndaloja së luajturi futboll dhe tani kam arritur në përfundimin se vera është momenti i duhur. Do të jem 34 vjeç në fund të marsit dhe çfarë mund të jetë më mirë se të tërhiqem në moshën 34 vjeç, numri që kam mbajtur mbi shpinë që në rini”, deklaroi Xhaka.
Drejtori sportiv i klubit, Daniel Stucki vlerësoi Xhakën për përkushtimin dhe mentalitetin fitues që ka treguar gjatë gjithë karrierës së tij te Baseli. Klubi i Baselit e falënderoi Xhakën për besnikërinë dhe kontributin e tij të çmuar gjatë gjithë kohës që ka qenë pjesë e skuadrës.
Komente
