Policia e Beratit ka vijuar hetimin e thelluar për vënien para përgjegjësisë të personave zyrtarë që janë përgjegjës për dëmtimin e zonës së mbrojtur të malit të Tomorit, tek i cili disa muaj më herët u zbulua kantier për nxjerrjen e gurëve dekorativ krejtësisht në kundërshtim me ligjin.
Si rezultat i kontrolleve të ushtruara në malin e Tomorit në nëntor të vitit të kaluar, ku u arrestuan 3 persona dhe u shpallën në kërkim 5 administratorë subjektesh për dëmtimin e zonës së mbrojtur, këtë të diel, (23 mars) Policia e Beratit njofton se janë ekzekutuar 4 masa të tjera sigurie, të caktuara me vendim gjykate, në akuzë për shpërdorim detyre të kryer në bashkëpunim.
Në arrest shtëpie janë Fatos Nako, drejtor i Agjencisë Kombëtare e Zonave të Mbrojtura në Berat, Servet Hoxha, përgjegjës monitorimi pranë AZDM Berat dhe Ledian Hasanaj, po ashtu përgjegjës i ADZM Berat. Ndërkohë, detyrim paraqitje u caktua për një 58-vjeçar, specialist i zonës në Komisariatin e Skraparit.
Për këtë rast, në muajin nëntor 2024, policia arrestoi 1 administrator subjekti, vëllain dhe kushëririn e tij, pasi u kapën duke larguar 1 mjet ekskavator me të cilin dyshohet se kishin nxjerrë gurë dekorativë. Gjithashtu u shpallën në kërkim 5 administratorë subjektesh. Në atë kohë, në Prokurorinë e Beratit u referuan materialet për drejtorin dhe përgjegjësin e AZDM Berat, dhe në kuadër të hetimit të kryer, gjykata pranoi kërkesën e organit të akuzës për lëshimin e masave të i sigurisë.
Komente
