Lezhë- Edhe pse ligji parashikon dënime deri në burgosje, emigrantët guxojnë që të publikojnë votën e tyre nëpërmjet rrjeteve sociale.
Rasti më i fundit që është proceduar është regjistruar nga një emigrant shqiptar rezident në Gjermani, i cili nëpërmjet rrjetit social TikTok ka publikuar votën e tij.
Policia e Lezhës njoftoi sot (6 maj) se ka nisur hetimet për 24-vjeçarin dhe dosjen ia ka kaluar Prokurorisë së Rrethit.
“Specialistët e Seksionit për Hetimin e Krimit Ekonomik dhe Financiar referuan materialet në Prokurori, ku nisi procedimi në gjendje të lirë, për veprat penale “shkelja e fshehtësisë së votimit” dhe “shkelja e së drejtës së zgjedhjes”, për shtetasin E. N., 24 vjeç, pasi ka publikuar në rrjetin social “TikTok”, një fotografi të fletës së votimit (të plotësuar) që e ka siguruar nëpërmjet shërbimit postar, duke qenë se është emigrant në Gjermani”, thuhet në njoftimin zyrtar.
Si provë është marrë kjo pjesë filmimi ku i riu shfaqet duke e shenjuar, sipas dosjes hetimore.
Komente
