Armand Zhejani, i dyshuar si një nga autorët e tentativës së grabitjes së një vile në fshatin Zejmen të Lezhës, është lënë në burg nga Gjykata ditën e sotme. Jashtë ambienteve të gjykatës ishte nëna e 23-vjeçarit, e cila shpërtheu në lot kur i biri doli jashtë gjykatës, duke i rënë më pas të fikët, për shkak të dhimbjes së madhe se i biri tashmë duhet të qëndrojë në qeli.
Më 9 nëntor, Armand Zhejani së bashku me një person tjetër, i cili nuk është kapur ende, të armatosur u futën në banesën të Zef Tehcaj, drejtor i shkollës së mesme të fshatit.
Por teksa kërkonin për para e sende të çmuara në banesë, grabitësit u trembën nga sirena e një ambulance që kaloi në rrugë, duke e ngatërruar me sirenë policie, duke u larguar pa marrë asgjë.
Ka qenë vetë drejtori i shkollës i cili ka parë nga kamerat e sigurisë që i kishte në celular se dy persona i ishin futur në shtëpi, ka njoftuar mësuesin e fizkulturës dhe rojën e shkollës dhe kanë shkuar menjëherë në shtëpi. Mësuesi i fizkulturës e ka ndjekur me vrap duke bërë të mundur kapjen e Armand Zhejanit, në ndihmë të të cilit kanë shkuar edhe banorët e fshatit. Ndërsa shoku i 23-vjeçarit, ende i paidentifikuar, mundi të largohet duke lënë në vendngjarje një pistoletë!
