Policia e Lezhës ka finalizuar operacionin 'Destinacioni', ku në pranga është vënë 48- vjeçari Arben Zagolli, pasi ditën e sotme u kap i armatosur me armë zjarri dhe me dy mina me telekomandë.
Sipas policisë, 48 vjeçari është kapur tek “Kryqëzimi i Shënkollit”, Lezhë, dhe udhëtonte me një taksi nga Pogradeci drejt Lezhës, me municionin luftarak me vete, të cilin do t'ja jepte një personi tjetër për të kryer ngjarje kriminale.
Gjatë kontrollit, Policia ka sekuestruar armën e zjarrit pistoletë, dy mina me telekomandë dhe municion luftarak.
Në bashkëpunim edhe me Prokurorinë Policia vijon punën për zbardhjen e plotë të qëllimit të udhëtimit të 48- vjeçarit të armatosur me armë zjarri dhe mina, si dhe për identifikimin e kapjen e shtetasit/ve që do të bashkëpunonte në Lezhë 48- vjeçari.
“Gjatë operacionit, në vendin e quajtur “Kryqëzimi i Shënkollit”, Lezhë, shërbimet e Policisë ndaluan për kontroll automjetin taksi ku udhëtonte si pasagjer shtetasi Arben Zagolli. Në përfundim të veprimeve procedurale u bë arrestimi në flagrancë i shtetasit Arben Zagolli, 48 vjeç, banues në Pogradec, për veprën penale “Mbajtja pa leje dhe prodhimi i armëve, armëve shpërthyese dhe i municionit”, thuhet në njoftim.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
S.B/ReportTv.al