Institucionet arsimore në Lezhë do të jenë gati për nisjen e vitit të ri shkollor, që fillon më 8 shtator. Pas evidentimit të problematikave, Bashkia e Lezhës prej disa javësh po punon për riparimin dhe sistemimin e godinave shkollore.
Drejtori i Arsimit, Rinisë dhe Sporteve në Bashkinë Lezhë, Keler Sufja, thotë se ndërhyrjet po kryhen në të gjitha shkollat, me qëllim që nxënësit t’i presin ambientet në kushte bashkëkohore.
“Ndërhyrjet në të gjithë shkollat e bashkisë Lezhë kanë nisur pas përfundimit të vitit shkollor. Prej asaj dite deri më sot vijojmë punën. Jemi fokusar kryesisht te lyerjet, stukimet, rregullimet e dyrerve dhe dritareve. Të gjitha shkollat do të jenë gati për vitin e ri shkollor. Pjesa më e madhe e buxhetit e bashkisë Lezhë sot shkon për arsimin", tha Keler Sufja.
Gjatë këtij viti Bashkia ka rritur buxheti i dedikuar arsimit, duke u investuar në pothuajse të gjithë kopshtet si në qytet, ashtu edhe në fshatra.
Në Bashkinë e Lezhës funksionojnë gjithsej 78 institucione arsimore, prej të cilave 35 janë shkolla dhe 43 kopshte.
Komente
