Zjarri i rënë në masivin pyjor mes Kurbinit dhe Matit është përhapur në një sipërfaqe të madhe, kryesisht në fshatin Madhesh të Matit.
Nga flakët është përfshirë dhe një banesë, ndërsa në rrezik është dhe zona e mbrojtur në Shkopet.
Terreni malor e bën të vështirë ndërhyrjen e zjarrfikëseve ndaj është dashur ndërhyrja me helikopter nga ajri për të shuar flakët
Flakët u shfaqën në orët e drekës dhe dyshohet për zjarrvënie te qëllimshme.
Situata e zjarrit në Madhesh të Matit vijon të jetë problematike.
Krahas ndërhyrjes me helikopter nga ajri po shtohen dhe forca të tjera tokësore në terren, me qëllim që vatrat e zjarrit të mbahen nën kontroll dhe mos të përhapen në fshatrat e tjerë përreth.
Në terren ndodhet dhe kreu i shërbimit zjarrfikës të Shqipërisë Arben Cara, sipas të cilit janë shpëtuar disa banesa dhe zjarri po mbahet nën kontroll.
Ai theksoi se do të ketë një shtim të forcave zjarrfikëse në terren.
“Prej disa orësh po luftohet me vatrat e zjarrit, për vënien në kontroll të vatrave të zjarrit, banesat janë shpëtuar dhe njerëzit janë evakuuar. Në vijim do të shtojmë forcat zjarrfikëse në terren që zjarri mos të përhapet në fshatrat përreth”, tha ai.
Rreth orës 12.30 të mesditës së sotme, ka rënë zjarr në pyjet e fshatit Madhesh, njësia administrative Ulëz.
Për shuarjen e zjarrit janë angazhuar shërbime të shumta policie, shërbimet e zjarrfikëses dhe një helikopter nga ajri.
Ndërkohë vijojnë hetimet për identifikimin dhe kapjen e autorit/ëve, të rastit të zjarrvënies.
