Në Shqipëri sipas organizatës ndërkombëtare “Reporterët pa Kufi”, është përmirësuar klima për lirinë e shtypit dhe pavarësinë e medias, krahasuar me një vit më parë. Vendi ynë në indeksin botërorë të kësaj organizate për vitin 2025, renditet i 80 nga 180 të tilla në klasifikim, ndërsa një vit më parë renditej i 99, një përmirësim me 19 vende.
Reporterët pa kufi evidenton se përmirësimi më domethënës i Shqipërisë është ai në aspektin legjislativ, ndërsa përkeqësimi më domethënës është shënuar në indikatorin politik.
Megjithëse raporti tregon një përmirësim të klimës së përgjithshme, evidentohen problematika. Reporterët pa kufij thotë se ‘liria e shtypit dhe pavarësia e medias në vend kërcënohet nga konfliktet e interesit midis botës së biznesit dhe asaj politike, një kuadër ligjor i mangët dhe rregullim partiak’.
Në raport thuhet gjithashtu se edhe pse kushtetuta e vendit dhe angazhimet ligjore ndërkombëtare garantojnë lirinë e shtypit, mbrojtja e konfidencialitetit të burimeve është e pamjaftueshme.
"Edhe pse kushtetuta e Shqipërisë dhe angazhimet ndërkombëtare ligjore garantojnë lirinë e shtypit, mbrojtja e konfidencialitetit të burimeve është e pamjaftueshme. Si pasojë e disa vendimeve gjyqësore të diskutueshme, mediave u është ndaluar të raportojnë për çështje të ndjeshme me interes publik", thuhet në raport.
Ndërkohë, sa i përket vendeve të tjera të rajonit, Mali i Zi renditet në vendin e 37-të nga vendi i 40-të që ishte një vit më parë, Maqedonia e Veriut ka shënuar përkeqësim duke u renditur e 42-ta nga 36 që që ishte në 2024, Serbia ndodhet në vendin e 96-të ndërsa Bosnje-Hercegovina e 86-të.
Kosova ka shënuar rënien më të madhe në 15 vitet e fundit në këtë indeks, duke u renditur në vendin e 99-të në botë. Ky është viti i dytë radhazi që Kosova shënon rënie, pasi në vitin 2024, ra nga vendi i 56-të në atë të 75-të.
Komente
