Në qytetin e Pogradecit ka nisur një aksion për lirimin e hapësirave publike, i cili po zbatohet me intensitet të shtuar në lagjen nr. 5. Ky operacion ka si synim kthimin e hapësirave të zëna padrejtësisht nga subjektet private dhe individë, duke i rikthyer ato për përdorim të përbashkët nga qytetarët.
Drejtori i Agjencisë së Mbrojtjes së territorit në bashkinë e Pogradecit, Markel Hafesllari u shpreh se ndërhyrja ka nisur që nga lagjia Kala e qytetit dhe po vazhdon në lagje të tjera. Konkretisht janë mbi 60 objekte pa leje te evidentuara ne 2 lagje të qytetit. Ndërkohë po evidentohen edhe në lagje te tjera të qytetit objekte që kanë zënë hapësirën publike.
Hafesllari i ka bërë thirrje qytetarëve për lirim vullnetar, ndërkohë nuk ka pasur rezistencë gjatë prishjes së objekteve, përkundrazi në disa raste vet nga pronarët e ndërtimeve ka filluar çmontimi i platformave.
Autoritetet vendore kanë bërë me dije se ndërhyrja do të vijojë në të gjitha lagjet e qytetit, me qëllim krijimin e një mjedisi më të pastër, më të rregullt dhe më të aksesueshëm për të gjithë banorët. Ndërsa disa prej objekteve të paligjshme janë raportuar edhe ne platformën qeveritare “hapësira ime”.
Komente
