Kanë ndryshuar masat e sigurisë për dy efektivët e policisë të cilët lejuan lirimin e super të kërkuarit Naser Gashi. Gjykata për Krime të Rënda vendosi të heqë arrestin me burg për policin Kujtim Spahia, me detyrë specialist i Policimit në Komunitet, duke i vendosur atij arrest shtëpiak. Ndërsa për dy punonjësit e tjerë të policisë Ferdinand Xhepa dhe Shkëlzen Ibaj është hequr edhe masa ‘detyrim paraqitje’.
Ndërkohë vijon të jetë ende në arrati dhe i shpallur në kërkim Agim Basha, në detyrë Shef i Komisariatit të Policisë Kukës. Ai akuzohet për veprën penale të "Korrupsion pasiv të gjyqtarëve, prokurorëve dhe funksionarë të tjerë të organeve të drejtësisë". Gjykata e Shkallës së Parë për Krimet e Rënda, ka caktuar ndaj tij masën e sigurisë "Arrest me burg".
Ndaj tyre ka nisur një hetim sipas të cilit me veprimet dhe mosveprimet e tyre, në kundërshtim me ligjin dhe në mos-përmbushje të ushtrimit të detyrës, kanë sjellë pasojë lirimin nga dhomat e paraburgimit të Naser Gashi, të cilin Gjykata e Apelit për Krimet e Rënda e ka dënuar me 7.4 vjet burg.
Gjithashtu, nën drejtimin e Prokurorisë për Krimet e Rënda vijojnë hetimet për të sqaruar pozitën e punonjësve të tjerë të Policisë dhe të Prokurorisë së Rrethit Gjyqësor Kukës.
Naser Gashi dhe Agim Basha
Historia e lirimit të trafikantit
Naser Gashi, kërkohej nga drejtësia shqiptare pasi ishte dënuar me 7.4 vite burgim. Mbrëmjen e 17 tetorit 2018, Gashi së bashku me shokun e tij Ron Nimani, kanë tentuar të dalin nga Shqipëria në Kosovë, me një makinë "Audi" duke përdorur pikën e kalimit kufitar Morinë. Pikërisht në këtë pikë kufitare, ata i janë nënshtruar kontrolleve, ku Gashi ka paraqitur dokumente identifikuese me emrin Saimir Bula. Si pasojë e dyshimeve të ngritura mbi këto dokumente, është vendosur nga policia kufitare që kosovari të shoqërohet në Drejtorinë e Policisë Kukës, ku t’i nënshtrohet identifikimit nëpërmjet gjurmëve të gishtave.
Por edhe pse u bë identifikimi që personi i shoqëruar nuk ishte Saimir Bula por i shumëkërkuari Nasër Gashi, me një urdhër të dyshimtë Prokurorja firmosi urdhrin e lirimit të menjëhershëm, vendim i cili u ekzekutua nga Policia në datë 18 tetor. Si për ndalimin por edhe për lirimin e trafikantit, Policia e Kukësit nuk dha asnjë njoftim për mediat, duke e nisur që në atë kohë fshehjen e kësaj ngjarjeje.
Skandali i nxjerrjes nga qelia të trafikantit Gashi, madje edhe duke i kthyer pasaportën dhe kartën e identitetit kosovare të falsifikuar me emrin “Saimir Buli”, bëri “kurban” zv/drejtorin e hetimit në Drejtorinë e Kukësit Shkëlqim Pepkolaj, i cili u pezullua nga detyra, duke u vënë në procedim disiplinor. Por pas hetimeve prokuroria lëshoi urdhr arrestet për drejtuesit e komisariatit të Kukësit. Naser Gashi rezulton se është dënuar nga Nertian Kosova më 21 shkurt 2013 me 7 vite e 4 muaj burg për trafik droge, vendim i lënë në fuqi edhe nga apeli i krimeve.
Komente
...KETA DY POLICET NUK LEJUAN LIRIMIN E NASER GASHIT POR ME NJE PUNE TEPER PROFESIONALE , E IDENTIFIKUAN DHE E FUTEN NE BURG. e CUDITSHME SE JANE DHE NE HETIM !!??
Përgjigju