Një vit nga refuzimi i vizës nga Shtetet e Bashkuara të Amerikës për të dhe familjen e tij, në vitin 2019 ish kryeprokurori Adriatik Llalla kontrakton një kompani lobimi në SHBA dhe kërkoi heqjen e këtij sanksioni. Lajmi atëherë u raportua nga Shqiptarja.com, që zbuloi se e përfshirë në këtë çështje ishte edhe një kompani me seli në Uashington ‘Lita Brothers’, në pronësi të të cilës ishin Gazment Lita dhe Korab Lita, ky i fundit më vonë u fut edhe në parlament si deputet i Partisë Demokratike.
Por Gazmend Lita është bërë së fundmi sërish protagonist në lajmet e mediave amerikane. Ai është përmendur në një aferë që ka përfshirë senatorin amerikan Bob Menendez. ‘The Daily Beast’ ka shkruar se kompania e tij po hetohet dhe që e lidh politikanin e lartë amerikan me 2 mbështetës të fuqishëm të demokratëve në SHBA dhe që lidhen me mashtrime përmes bankave dhe krim të organizuar.
Media të shumta kanë raportuar se hetimi i fundit i Departamentit të Drejtësisë ndaj Menendez, i cili kryeson Komitetin e fuqishëm për Marrëdhëniet me Jashtë, sillet rreth një kompanie misterioze të quajtur IS EG Halal, me bazë në shtetin e senatorit, New Jersey.
Në vitin 2019, qeveria egjiptiane i dha firmës amerikane të drejta ekskluzive për të trajtuar certifikimin për importet e saj të mishit ‘hallall’ – duke i dhënë ndërmarrjes së panjohur më parë një mundësi për furnizimit e një vendi me më shumë se 100 milionë banorë. Pra duke krijuar një monopol, pasi në Egjipt, i gjithë mishi i importuar duhet të jetë i certifikuar si "hallall", që do të thotë se është prokuruar, ruajtur dhe dërguar në përputhje me ligjin islamik. Marrja e kësaj certifikate është një kërkesë thelbësore për furnizuesit e mishit që të jenë në gjendje të hyjnë në tregun fitimprurës egjiptian.
Wall Street Journal raportoi se federalët kanë treguar një interes të veçantë për bashkëthemeluesin e IS EG Halal, Antranig Aslanian, një avokat që gazeta raportoi se mund të ketë lidhje me gruan e Menendez. Aslanian nuk pranoi të komentonte për këtë histori dhe IS EG nuk iu përgjigj kontakteve të përsëritura nga The Daily Beast.
Por një rishikim nga ‘The Daily Beast’ i të dhënave publike dhe i raportimit të lajmeve vendore dhe ndërkombëtare zbuloi se marrëdhëniet e IS EG shtrihen shumë më larg dhe prekin gjëra edhe më të errëta, sesa mendohej. Këto materiale e lidhin kompaninë jo vetëm me qeverinë egjiptiane, por me një grup biznesmenësh të Nju Xhersit, të ndërthurur me Menendez dhe aleatët e senatorit në makineritë e fuqishme politike lokale të këtij shteti: Fred Daibes dhe shqiptari Gazmend "Gus" Lita. Të dy sipërmarrësit janë përballur me drejtësinë të akuzuar për krime federale.
Dokumentet e fundit për kompaninë IS EG e vendosin atë në nën-komunën 301a, u depozituan nga një avokat i quajtur Denise Travers. Një nga entitetet e inkorporuara nën-komunën 301a të 125 River Road është 214 High Mountain Road LLC. Emri i këtij subjekti përputhet me një adresë të një prone në pronësi të Daibes në North Haledon, Neë Jersey. Emrat në dokumente janë të Gazmend Litës dhe bashkëshortes së tij.
Lita, një pronar dhe restaurator kompanie ndërtimi, është një donator tjetër i Menendez dhe partner i shpeshtë biznesi i Daibes Enterprises si në sektorin e mikpritjes ashtu edhe në atë të ndërtimit. Ai është gjithashtu, me pranimin e tij përmes një marrëveshjeje me Departamentin e Drejtësisë të fajësisë, themeluesi i një "klubi social" shqiptaro-amerikan që funksiononte si një strofkë e paligjshme e lojërave të fatit, e operuar si një grup shantazhi dhe që autoritetet e quajnë "Ndërmarrja e Diamantit”. Edhe pse jo një anëtar zyrtar i "Ndërmarrjes", Lita rrëfeu se kishte krijuar klubin me kërkesën e tij dhe se kishte marrë një pjesë të fitimeve të paligjshme.
Për më tepër, Lita është i lidhur drejtpërdrejt me IS EG Halal. Baza e të dhënave OpenCorporates identifikon Lita-n si drejtor i degës së IS EG në Indi, ashtu si edhe shumë shërbime të tjera që ndjekin të dhënat e biznesit në vendin e Azisë Juglindore. Lita mbetet i regjistruar në bazën e të dhënave të drejtorëve të kompanive, megjithëse ai nuk është më i lidhur me ndonjë firmë.
Ndërkohë, një memorandum dënimi që avokati i Litës dorëzoi pas pranimit të fajësisë, vuri në dukje se klienti i tij "nuk kishte zgjidhje tjetër veçse të jepte dorëheqjen nga pozicioni i tij më i fundit si inspektor i ushqimit hallall" gjatë gjyqit, për shkak të udhëtimit të gjerë ndërkombëtar të rolit të kërkuar—ndonëse avokati shtoi se Lita shpresonte të rifillonte punën së shpejti.
Lita dhe avokati i tij refuzuan të flisnin me The Daily Beast kur u kontaktuan. Por të dhënat publike amerikane tregojnë se India nuk është e vetmja qeveri e huaj me të cilën ai ka ndërvepruar.
Lita është gjithashtu agjent i 4 Jersey Street Associates LLC, një ent tjetër i bazuar në nën-komunën 301a në 125 River Road. Të dhënat publike tregojnë se në fillim të vitit 2021, ndërsa ishte nën padi federale për akuzën e lojërave të fatit, Lita jo vetëm që e inkorporoi këtë kompani, por e përdori atë për të blerë adresën titullare në bashkinë e East Rutherford nga Ministria e Mbrojtjes egjiptiane.
Në aktin e shitjes figurojnë dy emra avokatësh: njëri është Antranig Aslanian, bashkëthemeluesi i IS EG; tjetri është këshilltari i përgjithshëm i Daibes, Robert Travers.
Raportet lokale të lajmeve , së bashku me materialet e marra nga mediat amerikane dokumentojnë se Aslanian përfaqësonte qeverinë egjiptiane në përpjekjen e saj të dështuar për të marrë miratimin lokal për ta kthyer pronën në një aneks të Kombeve të Bashkuara dhe strehim për personelin ushtarak.
Mediat amerikane e theksojnë në shkrim se kjo nuk është as hera e parë që Lita merret me politikën globale. Në vitin 2019 , Open Secrets raportoi se kompania e tij e ndërtimit kishte ndihmuar në financimin e një fushate lobimi në emër të një zyrtari shqiptar (Adriatik Llalla) i cili ishte ndaluar të hynte në Shtetet e Bashkuara për përfshirjen në korrupsion publik. I njëjti artikull zbuloi se Lita kishte inkorporuar një biznes import/eksporti në Shqipëri me Korab Litën, deputet në Kuvendit të Shqipërisë. Emri i ndërmarrjes shqiptare, në pronësi të të dyve, është i njëjtë me atë të firmës së tij të ndërtimit në SHBA: Lita Brothers.
Komente
Keta te Rames te shkrine fare. Skandal i madh ne Amerike thone, vellai i ish dep te PD ka pagu 5 mije dollaro!!! I bie qe Rama meqe ka pagu 250 mije i bie qe te jete 50 mije here me i madh skandali!!! Briret e injorances dhe hipokrozise se ketyre qenkan epope me vete.
Përgjigju@Lali, qenke mire me matematiken ti, me mire se "Lulja", 7x7=42 :P , 50 mije X 5 mije sa bejne.......ose pyet Lulen ....