Tiranë- Një rast i organizimit të lojërave të paligjshme të fatit është goditur nga Policia e Tiranës ditën e sotme, në Kamëz.
Komisariati nr. 5 njoftoi se realizoi aksionin e koduar "Poker 5", duke arrestuar edhe 4 persona të dyshuar, që u kapën në flagrancë, brenda një lokali në rrugën “Roma”.
Si prova materiale u sekuestruan 1 tavolinë pokeri me çipsa, 2 tavolina të tjera të përshtatura për lojëra të palejuara, kompjutera me faqe që shërbejnë për lojëra fati.
Të ndaluarit janë pronari i lokalit, K. V., 69 vjeç, banues në Valias, për akuzën "organizimi ose ushtrimi i veprimtarive të lojërave të fatit në kundërshtim me ligjin", "vënia në dispozicion e lokaleve për lojëra të palejuara" dhe "fshehja e të ardhurave", si dhe Sh. M., 46 vjeç, T. Z., 58 vjeç dhe G. H., 40 vjeç, për veprën penale "organizimi ose ushtrimi i veprimtarive të lojërave të fatit në kundërshtim me ligjin".
Gjithashtu në cilësinë e provës materiale u sekuestruan dhe kompjutera me faqe që shërbejnë për lojëra fati, vendosje bastesh sportive.
