Ish-presidenti i SHBA-së, Joe Biden, në një intervistë për BBC, e cilëson presionin e administratës së Donald Trump mbi Ukrainën për të dorëzuar territor ndaj Rusisë si një "paqësim modern", duke paralajmëruar se një lëshim i tillë nuk do t'i ndalte ambiciet e presidentit rus Vladimir Putin.
Në intervistën e tij të parë që nga largimi nga Shtëpia e Bardhë, Biden tha se çdo ide për t'i dhënë Rusisë territore si pjesë e një marrëveshjeje paqeje është e rrezikshme. Ai shtoi se Putin nuk do të ndalet vetëm me Ukrainën nëse i jepet një precedent i tillë. Biden gjithashtu shprehu shqetësimin për “krizën” në marrëdhëniet SHBA–Europë nën drejtimin e Trump, duke thënë se kjo mund të ndryshojë rrjedhën e historisë moderne.
Duke reflektuar mbi vendimin e tij për t’u tërhequr nga gara presidenciale 2024 pas një debati të dobët dhe krizës që pasoi në Partinë Demokrate, Biden tha se ishte një vendim i vështirë, por i drejtë.
Ai mbrojti gjithashtu qëndrimin e tij për ndihmën ndaj Ukrainës, duke thënë se ofroi gjithçka që ishte e nevojshme për mbrojtjen e saj.
"Ne u dhamë atyre gjithçka që u nevojitej për të siguruar pavarësinë e tyre dhe ishim të përgatitur të përgjigjeshim, më agresivisht, nëse Putini do të ndërmerrte përsëri veprime", tha Biden.
Biden kritikoi retorikën e administratës Trump, përfshirë thirrjet për të marrë Kanalin e Panamasë, Groenlandën dhe për ta bërë Kanadanë shtetin e 51-të të SHBA-së, duke i cilësuar këto si fyerje ndaj vlerave amerikane.
"Çfarë dreqin po ndodh këtu? Cili president flet ndonjëherë kështu? Ne nuk jemi kështu. Ne jemi për lirinë, demokracinë, mundësitë, jo për konfiskimin.", u shpreh Biden.
Ai kritikoi gjithashtu qëndrimin e zyrtarëve si JD Vance dhe Pete Hegseth, të cilët kanë sugjeruar që Ukraina duhet të pranojë humbje territoriale për të arritur paqe me Rusinë. Biden paralajmëroi se dorëzimi i territorit do të dëmtonte besueshmërinë e NATO-s dhe do të shtynte shtete kufitare me Rusinë të bëjnë lëshime.
Biden kritikoi gjithashtu mënyrën se si administrata amerikane po e trajton presidentin ukrainas Volodymyr Zelensky. Në përfundim, ish presidenti amerikan tha se historia do të gjykojë presidencën e re të Trump, por shtoi se nuk sheh asgjë “triumfale” në zhvillimet e 100 ditëve të para të tij në detyrë.
"Do ta lë historinë ta gjykojë këtë. Nuk shoh asgjë që të ketë qenë triumfuese.", tha Biden.
Komente
